Sede Xudicial Electrónica
Avogados/as e procuradores/as
Dereitos, obrigas e réxime disciplinario
"As avogadas e avogados e procuradoras e procuradores de oficio teñen o deber de desempeñar as súas funcións de asistencia e representación de forma real e efectiva ata a terminación do proceso na instancia xudicial de que se trate"
Os principais dereitos ou facultades das avogadas e avogados e procuradoras e procuradores son:
- O dereito á retribución total dos seus honorarios pola asistencia, defensa e representación realizadas en todos aqueles procesos nos que os seus clientas e clientes teñan recoñecido o dereito á asistencia xurídica gratuíta. Estas retribucións serán con cargo aos fondos públicos da Xunta de Galicia.
- Na orde Penal, as avogadas e avogados designados contan coa facultade de escusarse da defensa, sempre que xustifiquen que concorre un motivo persoal e xusto. A apreciación do motivo de escusa será valorado pola persoa decana do seu colexio da avogacía.
- Se na sentenza que poña fin ao proceso houbese pronunciamento sobre costas, a favor de quen obtivo o recoñecemento do dereito á asistencia xurídica gratuíta ou de quen o tivera legalmente recoñecido, deberá aboar a parte contraria as costas causadas na defensa daquela.
Obrigas
As avogadas e avogados e procuradoras e procuradores de oficio teñen obrigas inherentes á súa designación, como son:
- Deber de desempeñar as súas funcións de asistencia e representación de forma real e efectiva ata a terminación do proceso na instancia xudicial de que se trate e, se é o caso, a execución das sentenzas, se as actuacións procesuais nesta se producisen dentro dos dous anos seguintes á resolución xudicial ditada na instancia, sen prexuízo do efecto das causas de renuncia ou escusa previstas legalmente.
- Obtido o pagamento polas persoas profesionais designadas de oficio conforme ao establecido regulamentariamente, estas estarán obrigadas a devolver as cantidades eventualmente percibidas con cargo a fondos públicos pola súa intervención no proceso.
- Para o cálculo dos seus honorarios e dereitos en xustiza gratuíta, as persoas profesionais están obrigadas a seguir as normas sobre honorarios de avogadas/os de cada colexio, así como os aranceis das procuradoras e procuradores vixentes no momento da substanciación do proceso.
Réxime disciplinario
O réxime disciplinario das avogadas e avogados e procuradoras e procuradores dos servizos de asistencia xurídica gratuíta réxese polas mesmas regras establecidas con carácter xeral para o desempeño das devanditas profesións, coas seguintes especialidades:
- A indebida percepción de honorarios, dereitos ou beneficios económicos terá sempre a consideración de falta moi grave.
- A imposición de sancións por infraccións graves ou moi graves, relacionadas coas actuacións desenvolvidas en materia de asistencia xurídica gratuíta, levará aparellada, en todo caso, a exclusión da persoa profesional dos servizos de asistencia xurídica gratuíta.
- Como consecuencia de queixas ou denuncias formuladas polas persoas usuarias dos servizos de asistencia xurídica gratuíta, e cando a gravidade dos feitos denunciados así o aconselle, poderá acordarse a separación preventiva do servizo da persoa profesional presuntamente responsable daqueles feitos, por un período máximo de seis meses ata tanto resólvase o expediente disciplinario incoado para o efecto.
Ligazóns relacionadas
Para saber máis...
- Constitución española
- Lei 1/1996, do 10 de xaneiro, de asistencia xurídica gratuíta
- Decreto 269/2008, do 6 de novembro, polo que se aproba o Regulamento de asistencia xurídica gratuíta de Galicia
- Orde do 18 de setembro de 2001 pola que se desenvolve o Decreto 146/1997, de 22 de maio, polo que se aproba o Regulamento de asistencia xurídica gratuíta da Comunidade Autónoma de Galicia
- Orde do 9 de decembro de 2003 pola que se desenvolve o Decreto 146/1997, de 22 de maio, polo que se aproba o Regulamento de asistencia xurídica gratuíta da Comunidade Autónoma de Galicia
- Lei Orgánica 4/2000, do 11 de xaneiro, sobre dereitos e liberdades dos estranxeiros en España e a súa integración social, modificada pola Lei orgánica 8/2000, do 22 de decembro
