Sede Xudicial Electrónica

Portal Xustiza
Suxestións
    Mostrar máis
    Preguntas frecuentes

    Atención á vítima e á cidadanía

    A onde podo acudir para obter información sobre o exercicio dos meus dereitos ante os xulgados e os tribunais?

    Unha das formas para obter información sobre o exercicio deses dereitos é acudir ás Oficinas de Asistencia á Vítima e Atención á Cidadanía. 

    Onde se encontran as Oficinas de Asistencia á Vítima e Atención á Cidadanía?

    Existen oficinas na Coruña, Santiago de Compostela, Ferrol, Lugo, Ourense, Pontevedra e Vigo. Poden consultarse os seus datos de contacto aquí.

    Podo acudir ás Oficinas de Asistencia á Vítima e Atención á Cidadanía aínda que non sexa vítima dun delito?

    Si. Aínda que non sexas vítima dun delito nin sexas parte nun procedemento xudicial podes acudir a estas oficinas, onde se che informará de cuestións de índole xeral ou se che remitirá ao órgano competente para resolver as túas dúbidas. 

    Só se considera vítima dun delito, aos efectos de ter os dereitos sinalados no Estatuto da Vítima, a quen sufre persoalmente o dano ou prexuízo producido polo delito?

    Non. O Estatuto da Vítima considera "vítima" a quen sufre directa e persoalmente os efectos do delito (tanto se son danos persoais, incluídos os danos emocionais, como calquera prexuízo económico causado directamente pola súa comisión).

    Pero tamén se aplican as súas disposicións aos/ás que son vítimas indirectas, considerando como tales no caso de producirse a morte ou desaparición dunha persoa e cando concorran as circunstancias previstas para cada caso: ao seu cónxuxe non separado legalmente ou de feito (ou persoa unida por análoga relación de afectividade) e aos fillos/as de calquera deles; aos seus proxenitores e parentes en liña recta ou colateral dentro do terceiro grao; ás persoas suxeitas á súa tutela ou curadoría ou que se encontraren baixo o seu acollemento familiar e a os demais parentes en liña recta e aos seus irmáns/irmás, con preferencia, entre eles/elas, do que exercera a representación legal da vítima. 

    Podo acudir á Oficina de Asistencia á Vítima e Atención á Cidadanía para informarme sobre un feito respecto do cal non existe un procedemento xudicial aberto?

    Si. No caso de que estas oficinas non poidan facilitarche a información que solicitas derivaranche ao órgano competente. 

    Que información podo obter nas Oficinas de Atención á Cidadanía se non son parte nun procedemento xudicial?

    Neste caso podes obter información de carácter xeral, relativa aos seguintes extremos:

    a) Identificación, situación e funcións dos órganos xudiciais e organismos interrelacionados coa Administración de Xustiza.

    b) Normas de repartición.

    c) Características dos distintos procedementos xudiciais e requisitos para a práctica de actuacións concretas.

    d) Lugar, data de celebración e outros datos de interese dos actos xudiciais públicos.

    Tamén podes acceder á información particular sobre un procedemento concreto cando acredites interese lexítimo neste. De pretender obter este tipo de información, un/unha funcionario/a da oficina derivarache ao órgano competente para acreditar o interese e, no seu caso, facilitar a información que proceda. 

    De que forma podo realizar consultas nas Oficinas de Asistencia á Vítima e Atención á Cidadanía?

    Pódese acceder á información comunicándose con estas oficinas de forma telefónica, por correo electrónico, por escrito ou comparecendo persoalmente (ou a través de representante legal acreditado, de procurador/a ou de avogado/a designados).

    Non obstante, a información particular sobre procedementos concretos unicamente se pode obter cando se solicita de forma presencial nas Oficinas do Atención á Cidadanía (ou a través dos representantes mencionados) ou por escrito e, en todo caso, previa identificación para comprobar a túa condición de persoa interesada no procedemento.

    Sendo parte nun procedemento xudicial, podo obter calquera información nas Oficinas de Asistencia á Vítima e Atención á Cidadanía?

    Non. Existen límites fixados polas leis procesuais, pola Lei Orgánica do Poder Xudicial e pola Lei Orgánica de Protección de Datos.

    Sendo parte nun procedemento, tes dereito a recibir, en todo caso, información particular relativa á fase e estado dos procedementos, á realización dalgún trámite concreto e á identificación das autoridades ou do persoal ao servizo da Administración de Xustiza que interveñan na tramitación dos procedementos.

    Teño que identificarme como vítima de violencia de xénero para que me faciliten información nas Oficinas de Asistencia á Vítima e Atención á Cidadanía?

    Non. A información facilítase sen comunicar os teus datos de identificación persoal nin achegar ningún tipo de acreditación da túa situación de violencia de xénero e conservando o teu anonimato, salvo que se solicite información sobre un procedemento concreto. 

    Podo ir acompañado/a de alguén da miña confianza, que non sexa avogado/a nin procurador/a, para efectuar unha consulta ou solicitude nas Oficinas de Asistencia ás Vítimas e Atención á Cidadanía?

    Si, o estatuto da vítima do delito establece que esta pode estar acompañada, durante a práctica das dilixencias nas que deba intervir, por unha persoa da súa elección, salvo resolución motivada en contrario. Tamén pode ir acompañada a estas Oficinas pola persoa que elixa. 

    Só me facilitan información nas Oficinas de Asistencia ás Vítimas e Atención á Cidadanía?

    Non. As funcións destas Oficinas non se limitan a facilitar información, senón que tamén se ocupan de prestar a asistencia que sexa precisa e a axuda necesaria para cubrir impresos e formularios. Ademais, en caso necesario, derivaranche ao servizo ou órgano correspondente e acompañaranche ao mesmo, se fose necesario e cando este se atope nas dependencias xudiciais. Noutro caso, facilitaranche os datos precisos para poder acudir ou contactar co servizo ou órgano competente.  

    Tamén podes presentar nestas Oficinas as queixas, denuncias e suxestións que estimes oportunas. 

    É preciso que as miñas peticións por escrito se fagan en impresos normalizados?

    Non. Facilitaranse formularios ás persoas interesadas para que poidan presentar por escrito as súas peticións.

    Estes formularios  estarán dispoñibles e á vista do público, pero non é obrigatorio o seu uso.

    Os datos que, no seu caso, subministre á Oficina de Asistencia á Vítima, pódense comunicar á terceiras persoas?

    Pódese facilitar información a terceiras persoas só nos casos expresamente previstos e cando a vítima o consinta, pero este consentimento ten que ser previo e informado. Fóra destes supostos só pode trasladar a información, e con carácter reservado, á autoridade que adopte unha medida de protección.

    Ten o xulgado a obriga de comunicarme as resolucións xudiciais que se diten, aínda que non compareza como parte no procedemento?

    Dentro dos dereitos básicos do Estatuto da Vítima de delito recóllese o dereito de achegar unha solicitude para que se lle notifiquen una serie de resolucións procesuais, que se reflicten no artigo 7 da referida norma.

    Para estes efectos, a vítima designará na súa solicitude un enderezo de correo electrónico e, na súa falta, un enderezo postal ou domicilio, ao que serán remitidas as comunicacións e notificacións pola autoridade. 

    No caso de ser vítima de violencia de xénero non é necesario que achegues a solicitude. O xulgado ten a obriga de comunicarche as seguintes resolucións: 

    • As resolucións que acorden a prisión ou a posterior posta en liberdade da persoa infractora, así como a posible fuga da mesma.
    • As resolucións ou decisións de calquera autoridade xudicial ou penal que afecten a persoas condenadas por delitos cometidos con violencia ou intimidación e que supoñan un risco para a seguridade da vítima. Nestes casos e para estes efectos, a Administración penal comunicará inmediatamente á autoridade xudicial a resolución adoptada para a súa notificación á vítima afectada.

    Cales son as resolucións que o órgano xudicial ten a obriga de notificarme, cando o solicite?

    Son as recollidas no artigo 7 do Estatuto da Vítima: 

    a) A resolución pola que se acorde non iniciar o procedemento penal. 

    b) A sentenza que poña fin ao procedemento. 

    c) As resolucións que acorden a prisión ou a posterior posta en liberdade da persoa infractora, así como a posible fuga da mesma. 

    d) As resolucións que acorden a adopción de medidas cautelares persoais ou que modifiquen as xa acordadas, cando tivesen por obxecto garantir a seguridade da vítima. 

    e) As resolucións ou decisións de calquera autoridade xudicial ou penal que afecten a suxeitos condenados por delitos cometidos con violencia ou intimidación e que supoñan un risco para a seguridade da vítima. Nestes casos e a estes efectos, a Administración penal comunicará inmediatamente á autoridade xudicial a resolución adoptada para a súa notificación á vítima afectada. 

    Cal é o contido da notificación que se me faga, cando proceda?

    Estas comunicacións incluirán, polo menos, a parte dispositiva da resolución e un breve resumo do fundamento da mesma. Serán remitidas ao teu enderezo de correo electrónico. 

    A notificación tense que facer por algún medio que deixe constancia da súa recepción, como por exemplo por correo certificado con acuse de recibo?

    Non. As comunicacións fanse por correo electrónico ou, excepcionalmente, se a vítima non dispuxese dun enderezo de correo electrónico, remitiranse por correo ordinario ao enderezo que facilitase. 

    No caso de persoas residentes fóra da Unión Europea, se non se dispuxese dun enderezo de correo electrónico ou postal no que realizar a comunicación, remitirase á oficina diplomática ou consular española no país de residencia para que a publique. 

    No caso de ter procurador/a, téñenme que notificar a resolución do mesmo xeito?

    As resolucións téñense que notificar ao teu procurador/a e tamén se teñen que comunicar á vítima no enderezo de correo electrónico que facilitou, no seu caso. 

    Podo rexeitar o envío das comunicacións?

    As vítimas, incluídas as de violencia de xénero, poderán manifestar en calquera momento o seu desexo de non ser informadas das resolucións, quedando sen efecto a solicitude realizada.

    Podo comparecer para que se me informe do estado do procedemento?

    Ténseche que facilitar, cando o solicites, a información relativa á situación na que se atopa o procedemento, salvo que iso poida prexudicar o correcto desenvolvemento da causa.

    NextGenerationEU
    Plan de Recuperación, Transformación y Resilencia
    Xunta de Galicia

    Xunta de Galicia. Información mantida e publicada na internet pola Xunta de Galicia

    - -