Sede Xudicial Electrónica

Os/As xuíces/as de paz son persoas sen formación xurídica específica, que levan a cabo funcións xurisdicionais e que integran o Poder Xudicial durante o tempo que están a desempeñar este cargo. Os/as xuíces/as de paz teñen deber de residir na poboación onde teña a súa sede a Oficina de Xustiza no Municipio, salvo autorización do TSXG.

Están á cabeza das oficinas de xustiza no municipio en todos aqueles municipios onde non exista un xulgado de Primeira Instancia e Instrución, e exercerán a súa xurisdición en dito o termo municipal.

A idade de xubilación non é requisito esixible ás persoas candidatas a xuíz/a de paz, que non están unidas por unha relación funcionarial nin de emprego coa Administración, senón que chega con acreditar que non existen impedimentos físicos ou psíquicos para o cargo.

Os/as xuíces/as de paz e os/as seus/súas substitutos/as serán nomeados/as para un período de catro anos pola Sala de Goberno do Tribunal Superior de Xustiza de Galicia. O nomeamento recaerá nas persoas propostas polo concello correspondente.

Os/As xuíces/as de paz están suxeitos a responsabilidade civil, penal e disciplinaria nos casos e coas garantías establecidas na Lei Orgánica do Poder Xudicial, no que lles sexa aplicable.

Na comunidade autónoma hai un total de 270 xulgados deste tipo. No Directorio de Órganos Xudiciais pódese consultar a distribución das oficinas de xustiza municipal por municipios e provincias.