Sede Xudicial Electrónica
Xuíces de paz
Que competencias ten un/ha xuíz/a de paz?
O/A xuíz/a de paz é competente, entre outras, nas seguintes materias:
- En materia civil é competente para coñecer, en primeira instancia, dos xuízos verbais relativos a reclamacións por cantidades non superiores a 150 euros. Tamén lles corresponde o coñecemento dos expedientes de conciliación civil de contía inferior a 10.000 euros.
- En materia de rexistro civil poderán expedir certificados de matrimonio, nacemento ou defunción, tramitar e resolver expedientes, recibir e rexistrar documentos, proporcionar información á cidadanía e realizar videoconferencias coas unidades do rexistro civil.
- En materia penal é competente para coñecer en primeira instancia dos xuízos por delitos leves que ocorran no seu municipio, como ameazas, coaccións, danos leves e maltrato animal.
Tamén coñecen dos actos de conciliación por feitos ocorridos no seu municipio nos procedementos por delitos de inxuria e calumnia contra particulares. -
En materia de auxilio xudicial é competente para a realización dos actos de comunicación requiridos por outros órganos xudiciais.
Quen é e que función ten o/a xuíz/a de paz?
En todos os municipios onde non existe un Xulgado de Primeira Instancia se atopa unha Oficina de Xustiza no Municipio como órgano de representación da Administración de Xustiza.
Á cabeza da Oficina de Xustiza no Municipio e representando á Administración de Xustiza nese municipio, encóntrase o/a xuíz/a de paz que é un/ha xuíz/a sen formación xurídica específica, que leva a cabo funcións xurisdicionais en todo o municipio e que integran o Poder Xudicial durante o tempo que está a desempeñar este cargo.
Quen pode ser xuíz/a de paz?
Debido a que se trata unha persoa sen formación xurídica específica, pode ser xuíz/a de paz calquera persoa que cumpra os seguintes requisitos:
- Ser cidadán/á español/a.
- Ser maior de idade.
- Non ter causa de incapacidade ou de incompatibilidade para desempeñar funcións xudiciais, aínda que pode ter a súa propia actividade profesional ou mercantil e non é necesario que dispoña do título de licenciado/a en Dereito.
- Ser nomeado/a seguindo o procedemento establecido legalmente.
Xunta de Galicia. Información mantida e publicada na internet pola Xunta de Galicia