Sede Xudicial Electrónica

Son parellas de feito as unións de dúas persoas maiores de idade, capaces, que convivan coa intención ou vocación de permanencia nunha relación de afectividade análoga á conxugal e que a inscriban no rexistro de parellas de feito de Galicia.

Segundo a Lei 10/2007, do 28 de xuño, que reforma a disposición adicional terceira de Lei de Dereito Civil de Galicia, os seus membros deben expresar a súa vontade de equiparar os seus efectos aos do matrimonio, co que se estenden aos membros da parella os dereitos e as obrigas que a lei recoñece aos/ás cónxuxes.

Non poden constituír parellas de feito:

• As persoas familiares en liña recta por consanguinidade ou adopción.
• As persoas colaterais por consanguinidade ou adopción ata o terceiro grao.
• As persoas que estean ligadas por matrimonio ou formen parella de feito debidamente formalizada con outra persoa.

As persoas membros da parella de feito poderán establecer en escritura pública os pactos que consideren convenientes para rexer as súas relacións económicas durante a convivencia e para liquidalas tras a súa extinción, sempre que non sexan contrarios ás leis, limitativos da igualdade de dereitos que lles corresponden como membros da unión ou gravemente prexudiciais para cada unha das persoas.

A inscrición no rexistro de parellas de feito de Galicia é voluntaria e ten carácter constitutivo. Para acceder á inscrición as persoas membros da parella de feito deberán cumprir os requisitos legais establecidos.