Sede Xudicial Electrónica
Rexistro civil
Como se solicitan os certificados e cal é o seu custo?
Os certificados poderanse solicitar por toda persoa que teña interese, sempre que non exista unha excepción legal ou se requira unha autorización especial.
Por regra xeral e dependendo do tipo de certificado, poderanse solicitar persoalmente no Rexistro Civil correspondente, por correo ordinario ou por internet a través da páxina web do Ministerio de Xustiza, sempre con indicación do enderezo de entrega.
As certificacións do Rexistro Civil son gratuítas.
Que feitos ou situacións aparecen recollidas no Rexistro Civil?
No Rexistro Civil, como institución encargada de deixar constancia e de publicar os feitos e situacións referidas ao estado civil das persoas, inscribiranse os seguintes estados:
- O nacemento.
- Modificacións e cambios de nome e apelidos.
- A filiación, que indica a relación de parentesco existente entre as persoas.
- As modificacións xudiciais á capacidade de obrar das persoas en situacións de prodigalidade, discapacidade, declaradas en concurso, insolvencia ou suspensión de pagamentos.
- A emancipación, como situación excepcional na que se pode obter a capacidade de obrar limitada antes dos 18 anos.
- Declaracións de ausencia.
- Declaración de falecemento.
- A nacionalidade.
- A veciñanza civil.
- A patria potestade, a tutela e outras representacións legais
- O matrimonio.
- A defunción.
Que tipo de certificados emiten os rexistros civís e cal é a súa validez?
Nos rexistros civís expídense varios tipos de certificacións: nacemento, nome e apelidos, matrimonio, fe de vida e estado, defunción, nacionalidade, tutela, etc.
Todos eles son documentos oficiais que acreditan e informan dos feitos e situacións relacionados co estado civil dunha persoa.
Os certificados, por regra xeral, non teñen data de caducidade ou validez, sendo o órgano ou institución que solicita a presentación do certificado solicitado o que pode impoñer unha antigüidade non superior a unha data determinada.
Que tipos de Rexistro Civil existen?
O Rexistro Civil español estrutúrase principalmente nos seguintes rexistros:
- Rexistros civís municipais. Están a cargo do/a xuíz/a de Primeira Instancia, asistido/a do/a Letrado/a da Administración de Xustiza. Por delegación destes, están a cargo dos/as Xuíces/zas de Paz os rexistros civís municipais delegados. Os rexistros civís municipais subdivídense en:
- Rexistros civís municipais principais. Actualmente en Galicia hai 43 rexistros civís principais, e un total de 431 no conxunto de España. En Galicia 2 deles son exclusivos, dedicados unicamente a tarefas de Rexistro Civil. O resto encóntrase a cargo dun/ha xuíz/a de primeira instancia, que realizan actividades rexistrais de forma parcial.
- Rexistros civís municipais delegados. As súas competencias son desempeñadas polas oficinas de xustiza no municipio. Na actualidade en Galicia existen 270 oficinas de xustiza no municipio, e en toda España existen 7.667.
- Rexistros consulares, están a cargo dos/as cónsules de España no estranxeiro e teñen competencia en materias que afecten o estado civil persoas españolas no estranxeiro. En cada demarcación consular existe unha oficina do Rexistro Civil. Na actualidade existen 177.
- Rexistro Civil Central, a cargo de funcionarios/as da Dirección Xeral dos Rexistros e do Notariado do Ministerio de Xustiza e ten competencia en toda España. Está situado en Madrid e nel inscríbense os feitos que non poden inscribirse en ningún outro rexistro e os feitos excepcionais. Neste rexistro tamén existen duplicados dos libros dos rexistros consulares
Xunta de Galicia. Información mantida e publicada na internet pola Xunta de Galicia