Sede Xudicial Electrónica

A mediación, a través do diálogo e o entendemento, permite dar unha mellor resposta naqueles litixios nos que as partes implicadas requiren manter unha relación posterior á resolución do conflito, polo que se presenta como un mecanismo apto na resolución das controversias familiares.

A implantación en Galicia da mediación moderna tivo lugar coa entrada en vigor da Lei 4/2001 de mediación familiar en Galicia (LMFG), e desenvolveuse mediante o Decreto 159/2003, polo que se regulou a figura da persoa mediadora, o Rexistro de Mediadores Familiares de Galicia e o recoñecemento da mediación gratuíta.

O carácter multidisciplinar do equipo mediador (xuristas, que explican ás partes a lexislación aplicable á súa relación e ao mesmo tempo as necesidades e particularidades do proceso, e psicólogos/as, que axudan a resolver os problemas de achegamento e enfoque das partes acadando o clima necesario para a negociación) permite orientar ás persoas que teñan iniciado un procedemento xudicial como resultado dun conflito familiar, para conseguir unha solución satisfactoria ás súas controversias, tendo en conta a necesaria relación posterior á resolución do conflito que han de manter por ter intereses comúns, considerando as necesidades de cada membro de familia e especialmente dos/as nenos/as.

Para levar a cabo esta actuación, a Xunta ten subscritos diversos convenios co Consello Xeral do Poder Xudicial, a Fiscalía Superior da Comunidade Autónoma, os colexios de avogados/as e psicólogos/as e a Universidade, para ofrecer o devandito servizo á cidadanía.

• Servizo de mediación familiar intraxudicial de Santiago de Compostela
• Servizo de mediación familiar intraxudicial de Ourense
• Servizo de mediación familiar intraxudicial de Vigo
• Servizo de mediación familiar intraxudicial de Lugo
• Servizo de mediación familiar intraxudicial da Coruña
• Servizo de mediación familiar intraxudicial de Pontevedra