Sede Xudicial Electrónica

A Lei Orgánica 5/1995, do 22 de maio, do Tribunal do Xurado establece que o desempeño da función do xurado será retribuída e indemnizada na forma e contía que regulamentariamente se determine, e terá, para os efectos do ordenamento laboral e funcionarial, a consideración dun deber inescusable de carácter público e persoal.

A devandita retribución e indemnización será de aplicación ás persoas membros do xurado, tanto titulares coma suplentes, durante o tempo que desempeñen a súa función, así como ás persoas candidatas a xurado designadas para cada causa que, previa citación, concorran ao proceso de selección xa mencionado.

Se algunha persoa candidata a xurado sostén que non dispón do diñeiro necesario para acudir á audiencia o día da celebración do xuízo, debe facer esta manifestación por escrito, que enviará á audiencia provincial xunto co cuestionario que ten que devolver no sobre que se achega á documentación.

Os conceptos que percibirán as persoas candidatas e as persoas seleccionadas como xurado, segundo a resolución do Consello de Ministros de 14 de xullo de 2006, son os seguintes:

• Retribucións  das persoas candidatas e das persoas membros do xurado:
  • Retribución diaria do xurado: 67,00 euros.
  • Retribución única das persoas candidatas non seleccionadas como xurados: 33,50 euros.
• Indemnizacións  das persoas candidatas e das persoas membros do xurado por gastos de viaxe:
  • Motocicleta: 0,078 euros por quilómetro.
  • Vehículo turismo: 0,19 euros por quilómetro.
  • Valor do billete de tren ou autobús.

Non se aboará o importe correspondente ao traslado en taxi, salvo que se acredite que, de non ter recorrido a ese medio de transporte, non fose posible chegar co tempo suficiente á sede da audiencia provincial para acudir á formación do xurado dentro do mesmo día.