Sede Xudicial Electrónica

Os dereitos e deberes dos/as cidadáns/ás ante a xustiza están establecidos pola Carta de dereitos dos cidadáns ante a xustiza, unha proposición non de lei aprobada polo Congreso dos Deputados no ano 2002 e que establece os principios de transparencia, información e atención adecuada aos usuarios e usuarias da Administración de Xustiza.

O obxectivo desta carta é lograr unha xustiza moderna e aberta á cidadanía para conseguir unha Administración de Xustiza responsable ante os/as cidadáns/ás.

Así, aos/as cidadáns/ás asístenlles os seguintes dereitos:

• Recibir información xeral e actualizada sobre o funcionamento dos órganos xudiciais, acceso ao contido actualizado das leis de España e da Unión Europea e a coñecer o contido e estado dos procesos nos que teñan intereses lexítimos.
• Formular queixas e suxestións sobre o funcionamento da xustiza e esixir, en caso necesario, as reparacións a que houbese lugar.
• Acceso a unha xustiza cunha linguaxe comprensible (sen perder rigor técnico) e responsable ante o/a cidadán/á.
• Tramitación áxil e tecnoloxicamente avanzada dos asuntos que lle afectan, para que se resolvan dentro do prazo legal previsto.
• Asistencia con especial atención e coidado daqueles que se atopan máis desprotexidos, como os que son vítimas de violencia doméstica e de xénero, os menores de idade, as persoas que sufran unha discapacidade sensorial, física ou psíquica ou os estranxeiros inmigrantes en España.
• Recibir unha prestación profesional de calidade por parte de avogados/avogadas e procuradores, consonte unha conduta deontolóxica correcta.
• Esixir o cumprimento do establecido na Carta de Dereitos xuíces/as e maxistrados/as, fiscais, letrados/as da Administración de Xustiza, médicos/as forenses, avogados/as, procuradores/as e demais persoas e institucións que cooperan coa Administración de Xustiza.

Os principais deberes dos/as cidadáns/ás ante a xustiza son:

• Participar na Administración de Xustiza mediante a figura do tribunal do xurado naqueles procesos penais que a lei determine. Os supostos de escusa, incompatibilidade e prohibición están delimitados pola lei.
• Obriga de prestar colaboración coa xustiza como testemuña, que esixe non só prestar testemuño senón tamén dicir a verdade.
• No caso de presenciar a comisión dun delito, a cidadanía ten o deber de poñelo en coñecemento e colaborar coa autoridade xudicial ou Ministerio Fiscal, salvo os que estiveren exentos por razóns familiares.