Oficinas de Xustiza nos Municipios

"Unha xustiza máis áxil, accesible e cercana para a cidadanía"

Destacamos

O proxecto de Oficinas de Xustiza nos Municipios busca dar resposta a problemas relacionados co acceso á xustiza en localidades onde a presenza de tribunais ou xulgados é limitada ou nula. Estas oficinas teñen como obxectivo mellorar a accesibilidade aos servizos xudiciais e administrativos, especialmente en áreas con risco de despoboación, permitindo que as persoas cidadás realicen trámites de maneira directa sen ter que desprazarse a grandes cidades.

O obxectivo principal das Oficinas de Xustiza nos Municipios é mellorar a accesibilidade á xustiza e facilitar a interacción das persoas cidadás cos diferentes servizos administrativos e procesais. A través destas oficinas, as persoas cidadás poderán realizar xestións de índole xudicial e administrativa sen ter que desprazarse longas distancias.

Ademais, estas oficinas tamén xogan un papel determinante na dixitalización do sistema xudicial. Moitos dos trámites poderán realizarse de maneira remota, reducindo a necesidade de desprazamentos e facendo que os procesos sexan máis áxiles.

 

Que servizos ofrecen as Oficinas de Xustiza nos Municipios?

> Asistencia á persoa xuíz de paz no exercicio das funcións que teña legalmente atribuídas.

> Atención á cidadanía e accesibilidade ao Servizo Público de Xustiza:

  • Actos de comunicación procesual: as oficinas realizarán actos de comunicación procesual coas persoas residentes no municipio.
  • Asistencia á cidadanía no uso de ferramentas dixitais que permitan realizar xestións coa Administración de Xustiza (por exemplo: obtención de Cl@ve Xustiza, acceso ao expediente xudicial electrónico, obtención de certificados, citas previas...).
  • Xestión de solicitudes de asistencia xurídica gratuíta.

> Servizos orientados á xestión e colaboración coas Oficinas Xudiciais:

  • Actos de comunicación procesual: as oficinas realizarán actos de comunicación procesual coas persoas residentes no municipio.
  • Actividades encamiñadas a permitir que quen resida no municipio poida comparecer ante os órganos xudiciais ou oficinas xudiciais de forma telemática.
  • Colaboración coa Oficina Xudicial en servizos auxiliares, así como atención á cidadanía para o acceso, en modo consulta, ao sistema de xestión procesual.

> Servizos de xestión e colaboración con outras unidades da Administración de Xustiza:

  • Colaborar co Rexistro Civil en aspectos como facilitar información á cidadanía en materia de rexistro civil, expedir determinados certificados, recibir e rexistrar solicitudes, entre outros.
  • Colaborar coas oficinas ou unidades competentes na implementación de medios adecuados de solución de controversias (MASC).
  • Colaborar coas oficinas ou unidades competentes na asistencia a vítimas de delitos.

> Servizos de atención ao persoal da Xudicatura, Fiscalía e Administración pública.

Modelos de referencia

Dos catro modelos posibles, en Galicia só aplican os modelos A e D.

Modelo A

Persoal só pertencente á Administración de Xustiza.

Na data en que se constitúa o tribunal de instancia do partido xudicial, cada secretaría de xulgado de paz desta clase transformarase nunha OXM, dotada con persoal funcionario da Administración de Xustiza e que prestará servizo unicamente no propio municipio.

Modelo B

Cabeceira da área. Persoal só pertencente á Administración de Xustiza.

As OXM cabeceira de área dotadas con persoal funcionario da Administración de Xustiza prestarán servizo no propio municipio e nos municipios integrados na súa área de influencia.

Modelo C

Integrada nunha área. O seu persoal é persoal idóneo designado polo concello.

OXM integradas na agrupación, dotadas con persoal designado polos concellos e atendidas por persoal da Administración de Xustiza da cabeceira. Prestarán servizo no municipio. Este persoal poderá realizar funcións auxiliares para asistir á cidadanía nun conxunto de servizos e prestacións a través dos sistemas dixitais cos que contarán ditas oficinas.

Modelo D

Non integrada na súa área. O seu persoal é persoal idóneo designado polo concello.

Prestarán servizo unicamente no propio municipio. O persoal destas OXM será atendido pola Oficina Xudicial do seu partido xudicial.

Mellora da accesibilidade

A dixitalización permitirá que as persoas cidadás poidan realizar unha ampla gama de xestións xudiciais sen necesidade de desprazarse, facilitando o acceso aos servizos, especialmente en zonas rurais ou sen tribunais próximos.

Eliminación de barreiras xeográficas

Os trámites como a presentación de documentos, a recepción de notificacións e a consulta de expedientes poderanse realizar de maneira telemática, evitando desprazamentos longos e mellorando a eficiencia dos procesos.

Descentralización dos servizos xudiciais

As oficinas de xustiza municipais actuarán como puntos de acceso locais, ofrecendo servizos de asesoramento e xestións xudiciais sen necesidade de desprazarse a grandes centros urbanos.

En conclusión...

A dixitalización das Oficinas de Xustiza nos Municipios (OXM) favorecerá a equidade territorial e a inclusión, garantindo un acceso máis directo, cómodo e eficaz á xustiza para todas as persoas.

Ligazóns relacionadas

Para saber máis...

Subir