Sede Xudicial Electrónica

Suggestions
    Show More
    Rexistro Civil

    Rexistro Civil

    "É necesario pedir cita previa no Rexistro Civil para evitar desprazamentos innecesarios"

    O Rexistro Civil é único e constitúe a proba dos feitos inscritos. É a institución rexistral que ten o labor, entre outras funcións, de dar publicidade e cooperar na constatación dos feitos e actos que acontecen dende o nacemento dunha persoa ata a súa morte.

    Entre as principais funcións e competencias, o Rexistro Civil é a institución na que se inscriben os feitos concernentes a:

    • Estado civil das persoas e aqueles outros como o nacemento, a filiación, o nome e apelidos e cambios sobre estes, a emancipación e a habilitación de idade.
    • As modificacións xudiciais da capacidade das persoas ou que estas foron declaradas en concurso, insolvencia ou suspensión de pagamentos.
    • As declaracións de ausencia ou falecemento.
    • A nacionalidade e veciñanza.
    • A patria potestade, tutela e demais representacións.
    • O matrimonio.
    • A defunción.

    O Rexistro Civil depende da Dirección Xeral dos Rexistros e do Notariado do Ministerio de Xustiza. A súa estrutura e organización é a seguinte:

    • Oficinas Xerais. Existen nas poboacións que sexan capital dun partido xudicial e substitúen aos anteriores Rexistros Civís exclusivos e principais, mantendo as mesmas funcións destes, aínda que o Encargado destas oficinas é un/ha Letrado/a da Administración de Xustiza. 

    • Oficinas colaboradoras. Estas oficinas comprenden os anteriores Rexistros Civís Municipais Delegados. As súas funcións xa no están desenvolvidas polos xuíces/as de paz, sendo os Letrados/as da Administración de Xustiza das Oficinas Xerais quen desenvolvan as funcións de Encargado/a do Rexistro Civil, tanto na súa Oficina Xeral como nas oficinas colaboradoras do seu partido xudicial.

    • Oficinas Consulares. Estas están ao cargo dos/as Cónsules de España no estranxeiro e teñen competencia para a práctica dos asentos rexistrais relativos a persoas españolas sobre feitos ocorridos na súa circunscrición consular. 

    • Oficina Central. Esta oficina substitúe ao Rexistro Civil Central. Entre outras funcións, encárgase de practicar a inscrición dos documentos auténticos estranxeiros xudiciais e extraxudiciais e certificacións de asentos estendidos en Rexistros estranxeiros, salvo aqueles cuxa competencia poida corresponder ás Oficinas Consulares do Rexistro Civil. 

    O modelo de rexistros civís actual foi reformado coa aprobación da Lei de Rexistro Civil, de 2011, e da súa reforma, a Lei 6/2021, que introduciron cambios organizativos, funcionais, tecnolóxicos e normativos. A entrada en vigor de ambas leis tivo lugar o 30/04/2021.